Plant yn arwain newid ym Mhenrhys

Yr wythnos hon, dathlwyd gwaith gwych y plant o Ysgol Gynradd Penrhys sydd wedi bod yn cymryd rhan yn y Prosiect Plentyn-i-Blentyn, a gyflwynwyd mewn partneriaeth â Trivallis, Valleys Kids a swyddog Ymgysylltu â Theuluoedd yr ysgol.

Dros y tri mis diwethaf, mae’r plant wedi bod yn archwilio eu cymuned, gan ddysgu am yr hyn sy’n gwneud Penrhys yn lle mor arbennig, pa heriau y mae’n eu hwynebu a sut y gallan nhw helpu i greu newid cadarnhaol.

Mewn digwyddiad dathlu arbennig, cyflwynodd y plant eu canfyddiadau yn hyderus i rieni, aelodau o’r gymuned a sefydliadau lleol. Roedden nhw’n rhannu nid yn unig yr hyn yr oedden nhw wedi’i ddysgu ond hefyd yr hyn maen nhw’n ei garu fwyaf am ble maen nhw’n byw.

Un o agweddau mwyaf pwerus y prosiect oedd gweld Penrhys trwy lygaid ei phobl ifanc. Roedden nhw’n gweld y gymuned drwy lygaid gobeithiol, creadigol a gonest. Fe wnaethon nhw siarad gyda balchder am y golygfeydd hardd, parciau lleol, mannau cymunedol a hyd yn oed am y siop cebab leol boblogaidd! Yn anad dim, fe wnaethon nhw dynnu sylw at rywbeth sy’n disgleirio ym mhob sgwrs – mae pobl ym Mhenrhys yn poeni am eu cymuned.

Nododd y plant hefyd faterion yr hoffen nhw eu gweld yn cael eu gwella, gan gynnwys sbwriel, baw cŵn, beiciau modur a beiciau llwybr, a phryderon am lygod mawr mewn rhai ardaloedd. Trwy arolygon, trafodaethau ac ymchwil, fe wnaethon nhw gasglu tystiolaeth a rhannu syniadau ar gyfer newid.

I lawer o’r plant, y cyflawniad mwyaf oedd dod o hyd i’w llais. Diolch i’r prosiect, rhoddwyd hwb i’w hyder, anogwyd gwaith tîm ac fe ddangoswyd iddyn nhw y gallan nhw wneud gwahaniaeth go iawn yn eu cymuned. Roedd eu gwylio yn cyflwyno eu gwaith gyda chymaint o hyder a balchder yn wirioneddol ysbrydoledig.

Mae effaith y prosiect eisoes yn cael ei gweld. Yn dilyn y cyflwyniad, ymrwymodd partneriaid gan gynnwys Gwasanaethau Sbwriel RhCT, Cadwch Gymru’n Daclus, SCCH lleol, cynghorwyr a’r Maer i gefnogi digwyddiad glanhau cymunedol ar 6 Gorffennaf. Bydd Cyngor Eco yr ysgol hefyd yn derbyn offer casglu sbwriel sy’n addas i blant i barhau â’u gwaith, tra bod cysylltiadau wedi’u gwneud gyda’r ganolfan casglu sbwriel leol yn yr eglwys.

Mae’r prosiect hwn wedi dangos pŵer gweithio mewn partneriaeth a beth all ddigwydd pan roddir cyfle i blant gael eu clywed. Mae eu lleisiau wedi sbarduno sgyrsiau, wedi ysbrydoli gweithredu ac wedi ein hatgoffa ni i gyd i ganolbwyntio nid yn unig ar yr hyn sydd o’i le, ond ar yr hyn sy’n gryf.

Diolch o galon i’r holl ddisgyblion, Mrs Jones a staff Ysgol Gynradd Penrhys, ac Amy, Ellen a’r tîm yn Valleys Kids am sicrhau llwyddiant heb ei ail y prosiect hwn.

Mae dyfodol Penrhys yn ddisglair, ac mae’r bobl ifanc hyn wedi dangos bod ganddyn nhw rôl bwysig i’w chwarae wrth ei siapio.