Cadw’n gynnes ac yn iach

Rydym am wneud yn siŵr bod pawb yn gallu cael cartref cyfforddus a hapus heb boeni am anwedd, lleithder neu lwydni’n tyfu.

Rydym ni’n deall bod y materion hyn yn gallu bod yn rhwystredig ac yn niweidiol i’ch iechyd, felly rydym ni am roi rhai camau hawdd i chi eu dilyn a fydd yn eu hatal nhw rhag digwydd yn y lle cyntaf.

Y cyfan y mae angen i chi ei wneud yw rhoi gwybod i ni am y broblem cyn gynted â phosibl, a gwnawn ein gorau i’ch helpu i’w drwsio. Gorau po gyntaf y byddwch yn rhoi gwybod i ni, er mwyn i ni allu gweithio gyda chi’n gynt i drwsio’r broblem cyn iddi waethygu.

Cadw’ch cartref yn sych

Mae cadw lleithder draw yn allweddol i atal anwedd ac atal twf llwydni.

Dyma sut i wneud hynny:

Awyr iach: Gadewch awyr iach i mewn drwy’r ffenestri, y drysau ac awyrellau.

Trwsio gollyngiadau: Rhowch wybod am ollyngiadau yn brydlon i atal gwlybaniaeth a llwydni.

Defnyddiwch gaeadau: Gorchuddiwch sosbenni wrth goginio i gynhyrchu llai o leithder.

Sychu dillad yn dda: Defnyddiwch lif aer da neu ddadleithydd os ydych chi’n sychu dillad.

Sychu i lawr: Sychwch arwynebau ar ôl cael cawod neu goginio i atal lleithder.

Defnyddio gwyntyllau echdynnu: Trowch wyntyllau ymlaen i sugno aer llaith allan mewn ceginau ac ystafelloedd ymolchi.

Ystafelloedd cynnes: Cadwch eich cartref yn gynnes i’w gadw’n sych.

Dadleithio: Defnyddiwch ddadleithydd os yw eich cartref yn teimlo’n rhy llaith.

Creu lle: Gadewch i aer symud o gwmpas dodrefn trwy beidio â’u gosod yn erbyn waliau, awyrellau neu reiddiaduron.

Cadw’n lân: Mae glanhau rheolaidd yn helpu i atal llwydni rhag tyfu.

Beth yw traws awyru?

Mae traws awyru yn fath o awyru naturiol sy’n caniatáu i aer ddod i mewn i un ochr i ystafell a gadael yr ochr arall. Yn ddelfrydol, mae traws awyru yn defnyddio grym wedi’i yrru gan aer i ddod ag aer oerach o’r tu allan yn lle’r aer cynnes hen tu mewn.

Peidiwch â gadael eich ffenestri ar agor am gyfnodau estynedig oherwydd bydd hyn yn arwain at golli gormod o wres, yn hytrach, agorwch ffenestri am ‘”gyfnodau byr, sydyn” o ryw 15 munud bob ychydig oriau i awyru’n gyflym, yn enwedig y peth cyntaf yn y bore i gael gwared ar aer hen a gynhyrchwyd dros nos.

Mae agor ffenestri ym mhob pen i’r eiddo er mwyn caniatáu traws lif yn cael ei argymell.

Anwedd

Mae anwedd yn digwydd pan fydd aer cynnes, gwlyb yn cyffwrdd ag arwynebau oer. Gall achosi lleithder a llwydni. Mae gweithgareddau bob dydd fel coginio ac anadlu yn rhyddhau lleithder. Sicrhewch fod eich cartref yn cael ei awyru’n dda i osgoi anwedd.

Pam mae anwedd yn broblem?

Gall gormod o anwedd arwain at dwf lleithder, difrodi deunyddiau adeiladu a difetha addurniadau. Cadwch lygad allan am arwyddion fel ardaloedd llaith ac arogleuon llwydni.

Gweld yr arwyddion

Chwiliwch am ddŵr yn rhedeg i lawr ffenestri, ardaloedd llaith a phapur wal sy’n dod oddi ar y wal. Mae lleithder yn golygu gwlypter na ddylai fod yno. Mae dau fath.

Llwydni

Ychydig mwy am leithder a llwydni

Gall lleithder a llwydni ddigwydd pan fydd lleithder yn cronni mewn cartref ac nad yw’n cael cyfle i ddianc. Efallai y byddwch yn sylwi ar smotiau du ar waliau, arogleuon llaith neu glytiau ar nenfydau a ffenestri.

Weithiau, gall gael ei achosi gan bethau syml rydym i gyd yn eu gwneud yn ein cartrefi. Serch hynny, yn aml mae newidiadau bach y gallwch eu gwneud a all wneud gwahaniaeth mawr drwy leihau lleithder a helpu aer ffres i lifo.

Mae sborau llwydni yn bethau byw bach iawn sydd bob amser yn yr aer, hyd yn oed y tu mewn i’ch cartref.

Ni allwch eu gweld, ac rydym yn eu hanadlu i mewn heb sylweddoli hynny. Ond pan fyddant yn glanio ar bethau ac yn cael yr amodau cywir i dyfu, dyna pryd y gallant ddod yn broblem. Mae angen pedwar peth ar lwydni i dyfu: maetholion, lleithder, y tymheredd cywir ac aer.

Pam mae llwydni yn broblem?

Gall llwydni achosi alergeddau, cosi a hyd yn oed pyliau o asthma. Os byddwch chi’n dod o hyd i lwydni, rhowch wybod i ni. Rydym ni yma i helpu.

Beth ddylwn i ei wneud os dof fi o o hyd i lwydni?

Dylech drin unrhyw leithder sydd gennych yn barod yn eich cartref, yna gwneud beth y gallwch chi i leihau anwedd a’i atal rhag ailffurfio neu ledaenu.

Cael help pan fydd ei angen arnoch chi

Gweithio gyda’n gilydd pan fyddwch ein hangen ni

Os ydych chi wedi rhoi cynnig ar bethau a bod y broblem yn dal yno, neu os yw’n effeithio ar eich iechyd neu pa mor gyffyrddus ydych chi, rydyn ni yma i’ch cefnogi chi.

Gallwch estyn allan ar unrhyw adeg. Byddwn yn gwrando ac yn trefnu ymweliad i ddeall y sefyllfa ac yn gweithio ochr yn ochr â chi ar gynllun sy’n addas i chi a’ch cartref.

Gall y gefnogaeth hon fod yn arbennig o bwysig os oes unrhyw un yn eich cartref:

• yn fabi, plentyn neu oedolyn hŷn
• ag asthma, ecsema neu gyflwr iechyd arall
• yn cael triniaeth sy’n effeithio ar ei system imiwnedd

Rydyn ni yma i helpu, nid i farnu. Mae eich llesiant yn bwysig i ni.

Cofiwch, gallwch chi helpu atal lleithder a thwf llwydni trwy ddilyn y camau yn y canllaw hwn. Ond os bydd angen ein help arnoch chi fyth, mae ein tîm medrus yma i chi. Mae cysur eich cartref a’ch iechyd yn bwysig i ni ac rydym ni yma i wneud eich cartref chi’n lle gwych i fyw.

Pan fyddwch chi’n ein ffonio ni am leithder a llwydni, bydd tîm y ganolfan gyswllt yn gofyn rhai cwestiynau i chi amdano.

Yna byddan nhw’n defnyddio’ch atebion i helpu ein contractwyr arbenigol Mouldex i drefnu ymweliad â’ch cartref.

Ar yr ymweliad cyntaf hwnnw, byddan nhw’n golchi unrhyw lwydni ac yna’n gwneud arolwg o’ch cartref i geisio gweld beth sy’n ei achosi.

Yn dibynnu ar yr hyn maen nhw’n ei ddarganfod yn yr arolwg hwnnw, efallai y byddan nhw’n dychwelyd i wneud mwy o waith, neu efallai y byddwn yn dod allan i wneud arolwg ychwanegol os oes angen gwaith mwy.

Weithiau, mae’n gallu bod yn anodd deall beth sy’n achosi problem anoddach, ond gallwn ni i gyd weithio gyda’n gilydd i geisio ei datrys – hyd yn oed os bydd yn cymryd ymweliad neu ddau.

Byddwn yn eich diweddaru bob cam o’r ffordd fel eich bod yn gwybod beth sy’n digwydd a pham.

I roi gwybod am leithder a llwydni, ffoniwch ni ar 03000 030 888 neu e-bostiwch customerservices@trivallis.co.uk.

Cymorth ariannol

Angen help llaw gyda chostau?

Os ydych chi’n ei chael hi’n anodd cydbwyso cynhesrwydd a biliau ynni, dim chi yw’r unig un – ac mae help ar gael.

Gall ein tîm cyngor ariannol eich cefnogi gyda’r canlynol:

• dod o hyd i grantiau neu gymorth ariannol
• gwirio eich cymhwystra i gael budd-daliadau
• syniadau ar gyfer lleihau costau ynni

Llenwch y ffurflen gyswllt ar ein gwefan neu ffoniwch ni ar 01443 494560. Byddwn yn cymryd un cam ar y tro, gyda’n gilydd.