Pennod newydd i Bontypridd wrth i Trivallis gwblhau pryniant Stryd y Taf

Mae Trivallis wedi cwblhau’r broses o brynu eiddo ar Stryd y Taf ym Mhontypridd, gyda chymorth gwerth £837,004 gan raglen Trawsnewid Trefi Llywodraeth Cymru, gan baratoi’r ffordd ar gyfer cartrefi newydd a gofod masnachol sydd wedi’u cynllunio i ddod â gweithgaredd newydd i ganol y dref.

Bydd y cynlluniau uchelgeisiol yn trawsnewid rhan amlwg a lled-adfeiliedig o Stryd y Taf, ger Llys Cadwyn, gan greu cartrefi modern ochr yn ochr â lle i drigolion ac ymwelwyr ei fwynhau ar y cyd yn ystod y dydd a min nos.

Bydd y datblygiad yn ategu’r gwaith adfywio sydd eisoes yn digwydd o amgylch y pen hwn o Bontypridd ac yn cefnogi cynlluniau ehangach i greu canol tref mwy bywiog a chroesawgar.

Daw hyn wrth i Bontypridd barhau i adeiladu ei gais i ddod yn Dref Diwylliant gyntaf y DU, gyda buddsoddiad sylweddol eisoes yn helpu i gryfhau mannau diwylliannol, hamdden a chyhoeddus y dref.

Meddai Louise Attwood, Cyfarwyddwr Datblygiadau Trivallis:

“Mae cwblhau’r pryniant yn garreg filltir gyffrous ac yn dod â ni gam yn nes at roi bywyd newydd i’r rhan hon o Stryd y Taf.

“Rydyn ni’n gwneud mwy na dim ond adeiladu cartrefi i’w rhentu – hoffem greu datblygiad sy’n ychwanegu rhywbeth at Bontypridd, a chyda’r buddsoddiad yn y metro, rydyn ni’n gweld cyfle gwirioneddol i’r rhai sy’n byw yng Nghaerdydd symud allan o’r ddinas i ardal sy’n wirioneddol ddynamig, bywiog a fforddiadwy.

“Rydyn ni’n falch o fuddsoddi yn y dref a chyfrannu at ei dyfodol cyffrous. Hoffem ddiolch i’n partneriaid yn Llywodraeth Cymru a Chyngor RhCT sydd wedi darparu cefnogaeth a’r cyllid ar gyfer y buddsoddiad.”

Meddai’r Cynghorydd Mark Norris, Aelod o’r Cabinet ar gyfer Adfywio a Thai, Cyngor Bwrdeistref Sirol Rhondda Cynon Taf:

“Mae hon yn garreg filltir bwysig ar gyfer ailddatblygu safle allweddol yng nghanol y dref ac yn gam cadarnhaol tuag at ddarparu cartrefi newydd yng nghanol Pontypridd. Bydd gwneud defnydd gweithredol o’r newydd o’r lleoliad amlwg hwn yn ategu’r adfywiad ehangach sy’n digwydd ledled y dref ac yn helpu i greu canol tref bywiog, deniadol a chynaliadwy.

Rydyn ni’n croesawu buddsoddiad Trivallis ym Mhontypridd ac yn edrych ymlaen at barhau i weithio gyda phartneriaid i gyflwyno datblygiadau sy’n cefnogi ein cymunedau ac yn cyfrannu at ddyfodol hirdymor y dref.”

Meddai Siân Gwenllian, Y Gweinidog Cabinet dros Lywodraeth Leol, Tai a Chynllunio: “Mae tai yn allweddol i fwrlwm a bywiogrwydd ein trefi, a bydd y caffaeliadau hyn yn caniatáu i’r gwaith symud ymlaen ar y cynlluniau manwl.

“Gall ailddatblygu’r safle hwn ar gyfer tai a gofod cymunedol helpu i ddenu pobl i ganol tref Pontypridd. Dyma’r union fath o bartneriaeth yr hoffem ei gweld yn sbarduno adfywio ledled Cymru.”

Bydd gwaith nawr yn mynd rhagddo ar y cynlluniau manwl ar gyfer y safle, gyda rhagor o wybodaeth i’w rhannu wrth i’r prosiect ddatblygu.