Cefnogi teuluoedd a chryfhau cysylltiadau cymunedol yn Hwb Cymunedol Nightingales, Penygraig

Yng nghanol Penygraig, mae Hwb Cymunedol Nightingales yn prysur ddod yn ofod croesawgar lle gall pobl leol gysylltu, cael cymorth a theimlo’n rhan o rywbeth cadarnhaol.

Sefydlwyd yr hwb tua 18 mis yn ôl, gyda’r nod syml ond pwerus o gynnig rhywbeth ystyrlon i’r gymuned. Yn ôl y sylfaenydd Melanie, er eu bod wedi bod yn rhedeg meithrinfeydd ers blynyddoedd, roedd awydd go iawn i wneud mwy.

“Roedden ni eisiau creu rhywbeth mwy cymunedol, rhywbeth a fyddai wir o fudd i deuluoedd ac yn dod â phobl at ei gilydd,” meddai.

Mae’r weledigaeth honno eisoes yn cael ei gwireddu. Mae’r hwb yn cynnig ystod gynyddol o weithgareddau a chefnogaeth i deuluoedd â phlant ifanc, gan gynnwys grwpiau i blant bach, ioga babanod, tylino babanod a sesiwn stori a chân wythnosol. Mae yna hefyd glinig bwydo ar y fron, sy’n darparu cymorth hanfodol i famau newydd mewn amgylchedd hamddenol a chyfeillgar.

Fel yr eglura Gemma, sy’n gweithio yn yr hwb, mae’r gofod wedi’i gynllunio i deimlo’n agored ac yn gynhwysol i bawb.

“Rydyn ni’n ofod eithaf unigryw sydd wedi’i deilwra’n bennaf ar gyfer teuluoedd ifanc, gyda chaffi, ardal chwarae a chymorth fel ein banc babanod, gyda’r cyfan wedi’i gynllunio i greu naws croesawgar a hygyrch”.

Gan weithio mewn partneriaeth â sefydliadau lleol, mae’r hwb yn helpu teuluoedd i gael mynediad at eitemau hanfodol hefyd. Mae’r banc babanod yn cynnig cewynnau, llaeth fformiwla, bwyd babanod a nwyddau ymolchi i’r rhai sydd eu hangen fwyaf. Mae cysylltiadau â sefydliadau fel Blynyddoedd Cynnar Cymru a Thîm Rhianta RhCT hefyd yn golygu y gall teuluoedd gael mynediad at gymorth ynghylch datblygiad cynnar, gan gynnwys lleferydd ac iaith.

Mae’n bwysig nodi nad yw’r hwb ar gyfer babanod a phlant bach yn unig. Mae grwpiau newydd yn parhau i gael eu sefydlu, gan gynnwys grŵp canu i famau, gyda chynlluniau ar y gweill i gyflwyno hyd yn oed mwy o sesiynau yn y dyfodol. Mae yna uchelgais hefyd i redeg grwpiau cymorth gyda’r menopos yn ddiweddarach eleni, yn amodol ar gyllid.

Ochr yn ochr â’i weithgareddau, mae’r hwb yn darparu cefnogaeth ymarferol, bob dydd. Mae dillad a theganau ar gael am y nesaf peth i ddim, gan helpu i leddfu’r pwysau ariannol i deuluoedd. Yn ystod misoedd y gaeaf, mae’r hwb hefyd wedi cefnogi’r gymuned drwy fenter ‘Winter Warmer’ RhCT, gan gynnig prydau fforddiadwy fel cawl poeth a rholiau.

Lan lofft, mae meithrinfa sefydledig yn parhau i ddarparu gofal plant, gan gynnwys darpariaeth Dechrau’n Deg i deuluoedd cymwys, gan sicrhau bod cymorth ar gael ym mhob cam o blentyndod cynnar.

Mae effaith yr hwb i’w gweld yn glir ym mhrofiadau teuluoedd sy’n galw heibio. Dywedodd Rachel, sy’n ymweld yn rheolaidd gyda’i merch, fod yr awyrgylch croesawgar a’r ymdeimlad o gymuned wedi ei denu yn ôl, ar ôl dechrau mynd yno pan oedd ei phlentyn yn ddim ond ychydig wythnosau oed.

“Gallwch gael coffi, ymlacio a theimlo’n gyfforddus. Rydyn ni wedi gwneud llwyth o ffrindiau ac mae fy merch wrth ei bodd.”

Mae’r ymdeimlad hwn o gysylltiad wrth wraidd yr hyn y mae Hwb Cymunedol Nightingales yn ceisio ei greu.

Mae’r prosiect yn dibynnu’n helaeth ar grantiau a chyllid, ynghyd â chefnogaeth gymunedol gref. Mae llawer o’i dwf hyd yn hyn wedi dod ar dafod leferydd, gyda mwy a mwy o bobl leol yn darganfod beth sydd ar gael.

Gan edrych ymlaen, mae cynlluniau i ehangu hyd yn oed ymhellach, gyda chyfleoedd i eraill ddefnyddio’r gofod a chynnal sesiynau ychwanegol, yn enwedig yn ystod adegau tawelach yn yr wythnos.

I’r rhai sydd â diddordeb mewn cymryd rhan neu ddod i sesiynau, gellir archebu trwy adael sylw ar dudalennau Facebook ac Instagram yr hwb, neu drwy anfon neges atyn nhw’n uniongyrchol.

Yn ei hanfod, mae Hwb Cymunedol Nightingales yn ymwneud â chreu gofod lle mae pobl yn teimlo eu bod yn cael eu cefnogi, eu croesawu a’u cysylltu. Wrth iddo barhau i dyfu, mae eisoes yn gwneud gwahaniaeth ystyrlon i deuluoedd ar draws ardal Penygraig.