“Pe bawn i’n gallu, byddwn i wedi dawnsio trwy’r penwythnos!”

I Liz, sydd wedi byw yn ei chartref ers bron i 40 mlynedd, mae gwelliannau diweddar wedi trawsnewid ei bywyd bob dydd ac wedi dod â thawelwch meddwl.

“O’r diwrnod y symudais i mewn, roeddwn i’n teimlo’n gyfforddus ac yn gartrefol iawn,” meddai Liz, a fagodd ei phedwar o blant yno. “Rydw i wastad wedi byw yn yr ardal hon, ac rydw i wrth fy modd yma, mae’n hollol hyfryd.”

Ond gydag arthritis yn effeithio ar ei phengliniau, ei chluniau a’i dwylo, roedd tasgau syml yn mynd yn anoddach. Roedd parcio yn anodd ar ei stryd brysur, ac roedd y grisiau serth a’r llwybr cul yn gwneud mynd i mewn ac allan o’r tŷ yn her.

“Weithiau doeddwn i ddim yn gallu parcio y tu allan o gwbl ac roedd yn rhaid i mi ddefnyddio maes parcio’r eglwys i lawr y ffordd,” meddai. “Mae’r eglwys yn hyfryd ac yn groesawgar iawn, ond ar benwythnosau prysur gallai fod yn orlawn, ac yna byddai’n rhaid i mi gerdded yn ôl i fyny’r bryn a oedd yn anodd.”

Pan glywodd fod blaen ei chartref yn cael ei drawsnewid, doedd Liz ddim yn gallu credu’r peth. “Dydw i ddim yn credu fy mod i wedi stopio gwenu. Pe bawn i’n gallu, byddwn i wedi dawnsio trwy’r penwythnos!”

Ddwy flynedd yn ddiweddarach, mae Liz yn dal i werthfawrogi’r gwahaniaeth. ”Hyd yn oed nawr, rwy’n edrych arno ac yn meddwl, waw. Os oes angen i mi ddefnyddio fy sgwter symudedd, mae’n hawdd mynd i mewn ac allan. Mae’r cwrb isel yn golygu nad oes neb yn cael parcio y tu allan, felly dwi’n gallu mynd a dod drwy’r amser.”

Mae diogelwch wedi gwella hefyd. Cafodd y patio ei lefelu, cafodd canllawiau eu gosod, a gwnaed y grisiau newydd yn lletach ac yn fwy bas. ”Gydag arthritis, mae rhai dyddiau’n dda, rhai yn ddrwg, a rhai yn ofnadwy, ond mae’r canllawiau yn golygu fy mod i’n teimlo’n ddiogel ac yn sefydlog. Mae hyd yn oed rhoi’r biniau allan yn haws nawr – ar ôl bod yn hunllef cynt.”

Mae hefyd wedi golygu mwy o amser gyda’r teulu. ”Mae fy mam yn 95 oed ac yn anhygoel, ond ers Covid mae ei symudedd wir wedi dirywio. O’r blaen, roedd yr hen risiau heb ganllaw yn ei gwneud hi bron yn amhosibl iddi ddod yma. Nawr gall hi fynd a dod yn haws a threulio amser gyda ni, sy’n hyfryd.”

I Liz, mae’r newidiadau wedi newid bywyd, ond yr hyn sy’n sefyll allan fwyaf yw’r gefnogaeth a gafodd. “Mae Trivallis wedi gwneud llawer iawn o waith yma ac mae wedi bod yn hollol wych.”

Mae hi’n dweud mai’r sicrwydd sydd bwysicaf. “Mae’n rhoi tawelwch meddwl – os oes angen gwneud rhywbeth, mae Trivallis yno i helpu, ac maen nhw’n gwneud gwaith da.”