Cam wrth gam: Sut mae’r Marauders yn newid y sgwrs ynghylch iechyd meddwl dynion

Ar gyfer Wythnos Ymwybyddiaeth Iechyd Meddwl, ymunodd Trivallis â’r grŵp Marauders Men’s Health ar un o’u teithiau cerdded wythnosol i ddarganfod sut y gall mynd am dro syml gael effaith bwerus ar les dynion yn y De.

Mae’n fore Mercher hyfryd yn y Bont-faen. Mae tua ugain o ddynion – ac ambell gi – wedi ymgynnull ar gyfer y Yellow Morgannwg Walk, taith chwe milltir drwy gefn gwlad lleol. Ond mae mwy i hyn nag ymarfer corff – mae’n ymwneud â chysylltiad.

“Rydyn ni’n griw gwych o ddynion,” meddai Jeremy Sims, Rheolwr Rhaglen y Marauders. “Rydyn ni’n cerdded, rydyn ni’n siarad ac rydyn ni’n gofalu am ein gilydd.”

Mae’r Marauders, a sefydlwyd i hyrwyddo lles corfforol a meddyliol dynion, yn cynnal teithiau cerdded wythnosol a gweithgareddau cymdeithasol am ddim, gan gynnwys y Torfaen Walk ddydd Llun a chyfarfod hamddenol Brew with a View ddydd Iau.

“Mae mwy i’r peth na cherdded,” meddai Ed Jennings, sy’n aelod hirhoedlog. “Mae’n dy gael di allan o’r tŷ. Rydyn ni’n cael paned, rhôl facwn a sgwrs. Hyd yn oed os yw hi’n bwrw glaw, mae rhywun dal eisiau dod.”

Meddai Jeff, sy’n aelod newydd: “Fe wnaeth yr enw ‘Marauders’ ddal fy sylw i – fe wnaeth i mi feddwl am y Llychlynwyr! Ond mewn gwirionedd, grŵp o ddynion yw e sy’n cerdded, siarad a rhannu. Mae’n hwyl, ac mae’n falm i’r enaid.”

Mae Marauders Men’s Health yn ein hatgoffa ni y gall camau bach, syml – fel cerdded a siarad – gael effaith fawr. Wrth i ni nodi Wythnos Ymwybyddiaeth Iechyd Meddwl, maen nhw’n cynnig esiampl wych o sut y gall grwpiau ar lawr gwlad ddechrau sgyrsiau a rhwydweithiau cymorth hollbwysig.

Ewch i’w tudalen Facebook am ragor o wybodaeth.