Troi bywyd o roi yn anrheg gymunedol

Troi bywyd o roi yn anrheg gymunedol

Yn Trivallis, rydyn ni’n gweld bob dydd sut y gall gweithredoedd o garedigrwydd a haelioni wneud gwahaniaeth go iawn ym mywydau pobl. Daw un stori sy’n cyfleu hyn yn berffaith gan Alison, y mae ei mam Ann wedi treulio ei bywyd yn helpu eraill. Hyd yn oed ar ôl ei marwolaeth, mae eiddo Ann yn helpu i harddu cartrefi a chefnogi teuluoedd yn y gymuned.

Dymuniad oes

Ar ôl i Ann farw o glefyd Alzheimer a chanser yr ysgyfaint, roedd ei theulu eisiau anrhydeddu ei dymuniadau. Roedd hi wedi mynegi dymuniad i’w heiddo fynd i’r bobl oedd eu hangen nhw fwyaf. Helpodd Trivallis i wireddu ei dymuniad, gan gymryd dodrefn ystafell wely ac eitemau cartref a’u cysylltu â thenantiaid lleol.  Diolch yn arbennig hefyd i Lucas Removals, a gefnogodd y symud yn garedig a helpu i sicrhau bod popeth yn cyrraedd y bobl oedd eu hangen.

Alison sy’n esbonio beth mae hynny’n ei olygu iddi: “Byddai Mam wedi bod mor hapus. Rwy’n gwybod y bydd hi’n edrych i lawr arnom yn llawen gan wybod bod ei heiddo wedi cael ei roi i rywun oedd ei angen.”

Gwneud gwahaniaeth go iawn

Mae’r eiddo a roddwyd yn fwy na dim ond dodrefn. Maen nhw’n helpu i greu cartrefi sy’n teimlo’n gyflawn ac yn dod â chysur a chefnogaeth i deuluoedd sydd eu hangen fwyaf.

Mae Alison yn rhannu ei gobaith am y rhai sy’n derbyn yr eitemau: “Rydyn ni i gyd wedi bod mewn sefyllfa lle mae angen rhywbeth arnom ni, ac os yw rhywun yn rhoi help llaw i ni, mae’n gwneud i chi deimlo mor ddiolchgar.”

Roedd gan rai eitemau le arbennig yng nghalon Ann: “Maen nhw i gyd yn arbennig i Mam. Byddai Mam yn rhoi enwau i bethau, felly fyddwn i ddim yn synnu dim pe bai gan eitem yno enw. Ei wardrob fwy na thebyg, gan ei fod yn llawn dillad yr oedd hi’n eu caru.”

Gwaddol sy’n parhau

Mae stori Ann yn atgoffa rhywun y gall haelioni dalu ar ei ganfed, gan greu effaith barhaol. Trwy Trivallis, mae ei heiddo yn helpu teuluoedd ac yn darparu cymorth ymarferol.

Mae Alison yn myfyrio ar rodd garedig ei mam: “Roedd rhoi yn rhan ganolog o’i bywyd, a nawr mae ei phethau yn sicrhau parhad y gwaddol hwnnw.”

Mae’r eitemau eisoes wedi dod o hyd i gartrefi newydd gyda thenantiaid ym Mae Caerdydd, gan gynnwys menyw nad oedd yn gallu fforddio eitemau cartref a chyn-filwr a oedd angen dodrefn yn ddirfawr. Mae eiddo Ann bellach yn gwneud bywyd bob dydd ychydig yn haws, yn unol â’i dymuniad.