Mrs P yn hybu ei hincwm gyda help gan dîm cyngor ariannol Trivallis (Saesneg yn unig)

Dechreuodd y cyfan pan roedd Mrs P yn cael sgwrs gyda’r Rheolwr Cyfrif Rhent, a sylwodd ei bod hi’n nesáu at oedran pensiwn y wladwriaeth. Sylweddolon nhw nad oedd Mrs Pa wedi cael y cod angenrheidiol i ddechrau ei chais am bensiwn. Cyfeiriodd y rheolwr hi at Sue Hoskins, Swyddog Cyngor Ariannol yn Trivallis, a gamodd i’r adwy i helpu.

Meddai Sue, “Dechreuais i gynorthwyo Mrs P â’i chais am bensiwn, gan gael y cod angenrheidiol a helpu gyda’r cais. Fe wnes i ei gwahodd hi i un o’n sesiynau galw heibio am Gyngor Ariannol i roi rhagor o help iddi.”

Rhannodd Mrs P, “Cefais i gymaint o lythyron a doeddwn i ddim eisiau gofyn am help oherwydd roeddwn i’n teimlo’n wirion. Roeddwn i’n cael trafferth deall eu hystyr nhw. Esboniodd Sue bopeth heb wneud i mi deimlo’n dwp.”

Ar ôl cwblhau’r cais am bensiwn, cynhaliodd Sue wiriad o fudd-daliadau i archwilio cymorth ychwanegol i Mrs P.

Esboniodd Sue, “Fe wnaethom ni ddarganfod bod hawl gan Mrs P i gymorth ariannol arall, gan gynnwys credyd pensiwn y wladwriaeth, budd-dal tai, gostyngiad yn y dreth gyngor a chymorth â’i bil dŵr drwy dariff Help U. Yn gyfan gwbl, fe wnaethom ni nodi £25,537.75 anhygoel o incwm ac arbedion ychwanegol i Mrs P yn flynyddol!”

A hithau’n ddiolchgar am y cymorth, dywedodd Mrs P, “Rwy’n ddiolchgar i Sue am wneud gwahaniaeth yn fy mywyd, yn ariannol ac yn feddyliol. Atebodd hi bob cwestiwn oedd gen i. I bobl fel fi sy’n teimlo’n bod ni wedi cael ein gadael ar ôl, mae help ar ben arall y ffôn. Peidiwch â bod ofn; gofynnwch am help.”

Ychwanegodd Sue, “Mae gweld yr effaith gefais i yn rhoi boddhad i mi. Rwy’n cadw mewn cysylltiad â Mrs P, gan gynnig cymorth parhaus. Fe wnaeth hi hyd yn oed ymweld â’r swyddfa gyda charden a siocledi i ddweud diolch.”

Nododd Sue, “Mae achos Mrs P yn unigryw ac allwn ni ddim addo symiau mor fawr i bawb. Ond mae pob ceiniog yn helpu’r achos, felly rwy’n annog pawb i fanteisio ar y cymorth sydd ar gael. Does dim byd gennych i’w golli ac mae gennych lawer i’w ennill, yn ariannol ac yn emosiynol.”