Gwneud gwahaniaeth gyda’n gilydd yn Fferm Capel

Ddydd Iau 16 Ionawr, daeth timau o Trivallis, Cyngor Rhondda Cynon Taf a’r gymuned ynghyd i wneud gwahaniaeth go iawn yn Fferm Capel, Tonyrefail.

Drwy weithio gyda’n gilydd, aethom ati i wella’r ardal a chreu amgylchedd glanach, mwy diogel a mwy croesawgar i bawb.

 Gydag ymrwymiad ar y cyd i wneud newid cadarnhaol, fe wnaeth Tîm Ystadau Trivallis a Thîm Glanhau Cyngor Rhondda Cynon Taf dorchi llewys a dechrau ar y gwaith. Aethom ati i dorri porfa a gwrychoedd, gwaredu gwastraff, mynd i’r afael â thipio anghyfreithlon, clirio llwybrau a defnyddio’r ysgubwr ffyrdd, gan helpu i wneud yr ardal yn fwy deniadol.

Dywedodd un preswylydd lleol a oedd yn hapus â chanlyniadau’r diwrnod: “Roedd hi’n bleser cael cerdded adref!”

Roedd aelodau o dimau cymdogaethau, atgyweirio a chyfranogiad Trivallis wrth law hefyd i ymgysylltu’n uniongyrchol â phreswylwyr drwy guro ar y drysau. Canolbwyntiodd y sgyrsiau ar sut y gallwn ni barhau i wneud newidiadau cadarnhaol gyda’n gilydd. Cafwyd sgyrsiau am atgyweiriadau sydd eu hangen ac anogwyd preswylwyr i gymryd rhan yn yr ymdrech i ddylanwadu ar ddyfodol eu cymuned.

Roedd Tîm Gorfodi Cyngor Rhondda Cynon Taf hefyd wrth law i ddarparu arweiniad ar ailgylchu a rheoli gwastraff yn effeithiol, dosbarthu bagiau ailgylchu a biniau bwyd, gan sicrhau bod gan bawb yr wybodaeth sydd ei hangen arnynt i gadw Fferm Capel yn dwt ac ar ei gorau.

Diolch yn fawr iawn i Ganolfan Adnoddau Fferm Capel am gynnig lluniaeth a lle croesawgar i bawb ymgasglu gydol y dydd. Roedd yn gyfle gwych i gysylltu, rhannu syniadau a chryfhau’r ymdeimlad o gymuned sy’n gwneud Fferm Capel yn lle mor wych.

Rhan fach yn unig yw hon o’r gwaith partneriaeth parhaus yn yr ardal ac o’r ymdrech i wneud Fferm Capel yn Ystad Wych.

Os ydych chi’n byw yn Fferm Capel, cofiwch fod eich Swyddog Tai Cymunedol, Laura Price, yn aml yn eich ardal. Os oes angen i chi gysylltu â hi, ffoniwch 03000 030 888.