Gweithio gyda’n gilydd i wneud Park View yn ystâd wych

Ddydd Iau 5 Rhagfyr, ymunodd timau o gyngor Trivallis a RhCT i helpu i roi hwb i Park View a gwneud gwahaniaeth go iawn i’r gymuned leol.

Er nad oedd y tywydd o’n plaid ni, gyda rhagolygon stormus ar gyfer drannoeth, daeth y criw at ei gilydd i wneud rhai gwelliannau gwych i’r ardal.

Cafodd coed a oedd wedi gordyfu eu tocio, llwybrau eu clirio, dail eu sgubo a sbwriel ei gasglu – gan drawsnewid Park View yn lle brafiach a mwy croesawgar y gallai tenantiaid fod yn falch ohono.

Nid tacluso oedd unig nod y diwrnod – roedd hefyd yn gyfle i wrando a gweithio gyda’n gilydd. Roedd aelodau’r tîm Trwsio ac Asedau yno, gyda rhai’n curo ar ddrysau, yn sgwrsio â thenantiaid am unrhyw waith atgyweirio heb ei riportio ac am welliannau i’w cartrefi.

Yn y cyfamser, roedd Rebecca, Rheolwraig y Gymdogaeth, a Lisa, y Partner Datblygu Cymunedol, yn brysur yn gwrando ar yr hyn sydd o bwys i drigolion Park View a Chynllun Llety Gwarchod Springfield.

Mewn ysbryd cymunedol, agorodd y cynllun llety gwarchod ei ardal gymunedol i gynnig llecyn cynnes a chroesawgar i bawb gysgodi rhag y glaw.

Wrth i bawb fwynhau diod boeth, cafwyd cyfle i sgwrsio a rhannu  syniadau am barhau i weithio ar y cyd fel cymuned.

Diolch i waith tîm gwych pawb a gymerodd ran, cafwyd diwrnod penigamp. Cafodd yr ardal ei gweddnewid a daeth pawb ynghyd i wneud yr ystâd yn lle brafiach.

Cofiwch fod Rebecca Lee eich Rheolwraig Cymdogaeth yn eich ardal yn aml, ac yn cynnal sesiwn galw heibio rhwng 10am-12pm bob dydd Mercher yn Valleys Kids, Pen Dinas.