Cymunedau sy’n arwain y ffordd gyda chyllid Rise Strong

Mae Rise Strong yn brosiect a arweinir gan y gymuned sy’n dod â theuluoedd ynghyd yng Nghae Fardre, Penrhys ac Aberdâr, er mwyn mynd i’r afael â materion lleol ac adeiladu dyfodol mwy disglair. Wedi’i ariannu gan grant Llywodraeth Cymru sy’n canolbwyntio ar roi’r dechrau gorau mewn bywyd i blant, nod y prosiect yw creu mwy o gyfleoedd cyfartal i bob teulu—gan helpu i godi gobeithion a dyheadau ar gyfer y dyfodol.

Pam mae Rise Strong yn Bwysig

Roedd y prosiect hwn yn rhan o gronfa Llywodraeth Cymru gyda’r nod o helpu plant a phobl ifanc i dyfu’n hapus, yn iach ac yn llawn uchelgais – waeth ble maen nhw’n byw. Trwy gefnogi cymunedau i gymryd yr awenau, mae Rise Strong wedi helpu i greu mwy o gyfleoedd i blant a theuluoedd ddysgu, cysylltu a ffynnu gyda’i gilydd.

“Mae’r prosiect hwn yn dangos beth all ddigwydd pan fyddwn ni’n ymddiried mewn cymunedau ac yn cefnogi pobl i weithredu ar yr hyn sy’n bwysig iddyn nhw.” — Jen O’Hara Jakeway, Pennaeth Ymgysylltu â’r Gymuned yn Trivallis.

Hwb Cae Fardre

Mae cyllid a chefnogaeth Rise Strong wedi helpu hwb cymunedol Cae Fardre i dyfu trwy ddarparu adnoddau a chymorth i greu gweithgareddau fforddiadwy i bobl ifanc a theuluoedd. Mae hyn wedi cynnwys gostwng costau ar gyfer digwyddiadau mewn ysgolion, ychwanegu chwaraeon newydd fel pêl-fasged, a chyflwyno gweithgareddau fel gwneud pizza i’r hwb i leihau rhwystrau o ran teithio. Mae 180 a mwy o bobl yn ymuno’n rheolaidd â sesiynau dysgu fel coginio a chrefftau. Mae’r cyllid wedi adeiladu partneriaethau lleol cryf ac wedi cynnig hyfforddiant hefyd, gan sicrhau bod yr hwb yn gallu parhau i gefnogi’r gymuned yn y tymor hir.

Gwylio: Rise strong_cae fardre

Ysgol Gynradd Caradog yn Aberdâr

Mae cyllid Rise Strong wedi helpu Ysgol Gynradd Caradog yn Aberdâr i gysylltu’n well â theuluoedd drwy greu gweithgareddau sy’n gysylltiedig â’r Cwricwlwm i Gymru. Er nad oedd unrhyw grwpiau cymunedol na staff ymgysylltu â theuluoedd, fe wnaeth y cyllid gefnogi teithiau, digwyddiadau, a chyfleoedd newydd fel gwersi ukulele. Mae mwy o deuluoedd yn cymryd rhan erbyn hyn, gan gynnwys y rhai nad oedden nhw erioed wedi gadael Aberdâr o’r blaen, ac mae rhieni’n helpu yn yr ysgol. Mae hyn wedi cryfhau’r berthynas rhwng teuluoedd a’r ysgol ac wedi helpu pawb i ddeall y cwricwlwm newydd yn well.

Gwylio: Rise strong caradog

Carnifal Penrhys

Diolch i gyllid Rise Strong, roedd modd atgyfodi Carnifal Penrhys dan arweiniad y gymuned, gan ddechrau gyda digwyddiad llai – Sioe Ffasiwn – i feithrin hyder a sgiliau. Fe wnaeth pobl leol, gyda chefnogaeth artistiaid a gweithwyr cymunedol, fynd ati i wnïo a dylunio fel rhan o’r gwaith paratoi ar gyfer y digwyddiad, a oedd yn cynnwys 20 a mwy o deuluoedd. Fe wnaeth y prosiect helpu i ail-feithrin ymddiriedaeth, datblygu doniau, a symud grym i ddwylo trigolion lleol. Llwyddodd i greu gofod cadarnhaol, cynhwysol, gan roi hwb i hyder a gosod y llwyfan ar gyfer digwyddiadau dan arweiniad y gymuned yn y dyfodol, megis carnifal yr haf.

Gwylio:Rise strong penrhys – YouTube

Mae Rise Strong yn tynnu sylw at y grym a geir o fynd ati o ddifri i wrando ar gymunedau a’u grymuso. Trwy ymddiried yn y bobl leol i arwain, siapio a chyflawni’r gweithgareddau sydd bwysicaf iddyn nhw, mae Rise Strong wedi dangos bod buddsoddiad sydd wir wrth galon angen lleol yn cael effaith ddyfnach a gwerth hirdymor.

Pan fydd cymunedau’n cael yr offer, y gofod a’r gefnogaeth i wneud penderfyniadau drostyn nhw eu hunain, mae’r canlyniadau’n fwy perthnasol, cynhwysol a chynaliadwy.